El proyeutu consiste en la financiación de la ellaboración de una pipa de sidra natural l´allume. Agora qu´entama la collecha de la mazana 2016 pedimos la collaboración pa mercar les mazanes que necesitamos pa facer esa pipa de unos 11.500 ltrs.
La idea ye que s´apadrinen sacos de mazanes, pumares o pumaraes y se participe en tol procesu d´ellaboración de la sidra hasta que na primavera de 2017 parte de ella retorne a los sos padrinos, que van poder prebar asina la sidra fecha coles mazanes apadrinaes.
Amás de la sidre, vas algamar tamién otres recompenses rellacionaes col llagar. Y por supuestu, vas echar un gabitu a esta empresa d´economía social que´n magar entamó a furrular va ya tres años, vien fomentando´l cooperativismu, l´usu y normalización de l´asturiano y sofitando la comunidá na que se desendolca.
Características básicas y objetivos
El proyeutu pue esplicase dende dos vertientes: per un lláu, dende´l conceutu, naguamos porque la xente que sofita l´allume nos chigres puea garrar la idea de la cooperativa, camudando nésti sen el papel de cliente pol de pequeñu productor de la nuesa sidre. Per otru lláu, esto queremos plasmalo téunicamente nuna forma de financiación: apurriendo perres agora pa mercar la mazana desta seronda y algamar, na próxima primavera, sidre fecha con eses mazanes.
Motivación y a quién va dirigido el proyecto
La motivación ye dai un puxu a la capacidá de producción del llagar nesti añu. Paeznos qu´agora mesmo tamos a puntu dar un reblagu curiosu nel trabayu que facemos. Pero vamos necesitar un emburrión económicu pa nun tener llimitada en forma la capacidá de producción. Recoyendo varies iniciatives de xente que interésose fonderamente poles posibilidaes de echar un gabitu con otres formes amás de allumase nos chigres, paeciónos que yera el momentu de pedir esi emburrión que necesitábemos.
El proyeutu va dirixíu, de mano, a tolos llumeros que nos sofiten tolos díes. Pero a tola xente quei preste la nuesa sidre, les formes empresariales basaes nos principios del cooperativismu y la economía social o la normalización de la llingua asturiana; seguro que va interesái apadrinar el so pumar.
Oxetivos de la campaña de micromexenalgu
A una plazu más curtiu, l´oxetivu ye financiar parte de la campaña de producción qu´entama agora y va condicionar les esistencies del añu qu´entra enteru. A mediu plazu, trátase tamién de abrir les puertes a tola xente que siéntese identificada col trabayu y les formes de facer de la cooperativa y que nun atopa abondo collaborar namás que como clientes mercando la sidra nel chigre o nel llagar. Ye una oportunidá pa fidelizar a los clientes de l´allume pero tamién de dai un puxu al nuesu trabayu, y algamar a xente qu´entá nun conoz de nós.
Esperiencia previa y equipu
sidra l´allume facémosla na cooperativa La Llume, SCA. Entamemos a furrular en mayu de 2013 y somos agora cuatro socios trabayaores, collacios de L´Entregu dende neños: nacho- inxenieru téunicu indutrial-, Pablo -oficial del metal-, Coto -periodista-, y Adrián -loxística-.
Dempués de delles vueltes llaborales y viaxes d´ida sin vuelta a Madrid, rexùntémosnos va cuatro años n´Asturies y cayímos na cuenta qu´esta vegada nun compartíemos namás que les ganes de facer el llagar col que naguabámos de guajes cuandu mayàbemos en casa´l güelu Adrián. Angüaño compartíemos daqué muncho más importante: l´apuesta por nun colar otra vuelta fuera, les perres del despidu y el paru.
Fae agora tres años que tenemos la sidra na cai, y a puntu entamar a mayar la cuarta collecha de l´allume, atalantamos qu´esti añu va ser perimportante pal futuru la cooperativa. Poro, pidímosvos esti sofitu financieru pa mercar les mazanes de les que va salir l´allume 2017.