Cierva y Culiebra - Editorial asturiana

Pensemos Cierva y Culiebra específicamente pa intervenir nel mundu de les lletres asturianes y ameyorar delles de les coses que percibimos nél. El propiu nome de la editorial vien d'un vieyu conxuru vaqueiru escontra la picadura de la culiebra, y reflexa dalgunos de los rasgos principales del proyectu: queremos que los nuesos llibros xurdan del diálogu, como'l qu'hai nesa llucha mítica ente la culiebra y la cierva, y tamién queremos conxugar la cultura tradicional col tar nel mundu contemporaneu, convidando a nuevos llectores a que conozan la lliteratura y el pensamientu nos que creemos nós.

Poro, vamos editar poquitinos llibros al añu: en principiu, namás 2, porque pensamos que lo importante ye que los llibros lleguen a los sos llectores y queremos cuidalos bien, mesmo primero d'editalos que depués. Pa ello, vamos contar col diseñu de Lucía Aranaz y los nuesos dos primeros títulos de la editorial van ser:

• La Xorda. Nuevos cantares de chigre, prólogu y selección de Rodrigo Cuevas. Una renovación de los antiguos cancioneros pa cantar nos chigres y sidreríes, con una escoyeta de cantares vieyos y nuevos fecha pol músicu Rodrigo Cuevas, que mos guía per una nueche de folixa psicalíptica. Esti llibru, que reflexa'l patrimoniu musical popular al empar que lu proyecta hacia'l futuru, amuesa qu'equí, tovía, pue cantase. Va acompañáu d'una serie d'ilustraciones feches por ilustradores nuevos.

• Nun vaya ser el demoniu. El diablu n'Asturies, de varios autores. Dende'l diablu «cortés» qu'embruxara a la endemoniada Oria, una muyer del sieglu XII, hasta les tropes demoníaques que pueblen la nuesa lliteratura fantástica actual, el diablu asturianu nun ye ún nin trinu, sinón múltiple. El demoniu ye una fuercia de la contradicción que cumple funciones mui estremaes na lliteratura (villanu o bobu, símbolu o deus ex machina) y, poro, nun se puede reducir a una definición sola. Nesti llibru recuéyense testos diabólicos de tola tradición asturiana que van dende la Edá Media hasta'l sieglu XXI y que mos amuesen que, como mos aprende la etimoloxía, Satán nun ye otro que'l gran acusador de la humanidá.

¿Cómo van ser los llibros de Cierva y Culiebra?

Amás, vamos facer les ediciones con munchu procuru: nel planu estéticu, porque entendemos que'l diseñu fai parte del llibru de la mesma manera que'l montaxe fai parte de la película; y nel planu testual, porque queremos asoleyar llibros que tean especialmente pensaos pal mundu asturianu.

Va haber una única colección, na que se van amestar ficción, pensamientu, poesía o cantares. Creyemos que lo importante ye que los llibros s'adecuen a la realidá de nueso, y queremos dirixinos a los llectores asturianos de la meyor manera posible. Los nuesos oxetivos son:

1. Crear llibros que collaboren a repensar el mundu asturianu y n'asturianu.
2. Facer porque esos llibros lleguen de la meyor manera a los llectores.
3. Enanchar la base llectora n'asturianu.
4. Enanchar l'espaciu de posibles de la lliteratura asturiana.

Ocurriósenos la idea d'aniciar Cierva y Culiebra al decatanos de qu'había un güecu y unes necesidaes que nun taben cubiertes dientro del sistema editorial asturianu, onde munches veces los llibros espúblicense de manera voluntarista y ensin un proyectu editorial firme tres d'ello. Amás, queremos nun depender esclusivamente del sistema de subvenciones y crear una comunidá qu'apoye esti trabayu editorial a lo llargo del tiempu.

Poro, el proyectu va dirixíu a la xente que yá llee n'asturianu y fai parte del movimientu de reivindicación llingüística y de recuperación de drechos pa la xente asturiano. Pero tamién queremos algamar al públicu que llee menos n'asturianu pero que ta igualmente esmolecío pola realidá de nueso y tien interés pola creación lliteraria que tien llugar n'Asturies

En conxuntu, l'equipu trabayó con éxitu en delles iniciatives editoriales, dende fanzines de poesía a revistes de lliteratura xoven (Oculta Lit), pasando per estremaos medios de comunicación, como Tentaciones, La Nueva España, Clarín. Revista de Nueva Literatura, CTXT o Nortes.

Amás del trabayu nel mundu editorial, tenemos esperiencia como compradores compulsivos de llibros, llectores, críticos o autores nel mundu de la literatura. Darréu contámoste un poquiñín quién somos y cuál va ser el trabayu que fagamos dientro de la estructura de la editorial.

Conseyu editorial:

Lucía Aranaz (Uviéu, 1992). Diseñadora de profesión y llectora por vocación. Graduóse en diseñ gráfico na Escuela Superior d'Arte d'Avilés y en 2018 treslladóse a Barcelona pa cursar un máster en Diseñu Editorial. Dende allá compaxina'l trabayu de diseñadora gráfica nuna marca de xoyería con otros proyectos editoriales y d'ilustración.

María García Díaz (La Pola Siero, 1992) ye física, música y profesora na Universidad Politécnica de Madrid. Como poeta, espublizó Espacio virgen (Torremozas, 2015), obra ganadora del XVI premiu «Gloria Fuertes» de Poesía Joven; Llírica astraición (Saltadera, 2016), n'asturianu, y Suave la matriz (Saltadera, 2018). Ye capital tolo que fluye (Ultramarinos, 2021) ye'l so últimu poemariu en llingua asturiana.

Diego Álvarez Miguel (Uviéu, 1990). Espublizó los llibros de poesía Un día, tres otoños (Torremozas, 2012, Premio Gloria Fuertes de Poesía Joven), Lugares últimos (Ediuno, 2014, Premio de la Universidad de Oviedo), Hidratante Olivia (Hiperion, 2015, Premio de poesía Hiperion) y Meh (Valparaíso Ediciones, 2018). Ente 2016 y 2020 dirixó la revista lliteraria Oculta Lit.

Natalia González Menéndez (Morcín, 1995) ye filóloga con Máster n'Edición Lliteraria. Depués de dellos años como llibrera, a día de güei trabaya como autónoma nel sector editorial. Cuando nun ta ente llibros, toca la gaita na escena del punk-folk.

Fernando Martínez Lavandera (Biedes, 1993) estudió física na Universidá de Uvieu y na UNED. Foi editor de la revista Oculta Lit y fixo parte de dellos proyectos lliterarios, como Oliver Punk (2018) o la serie de radioficción La ciencia del cuentu (2021).

David Guardado Diez (Xixón, 1970) estudió Filoloxía Inglesa, y ye Especialista Universitariu en Llingua Asturiana, asina como espertu en treformación dixital y académicu de númberu de la Academia de la Llingua Asturiana. Ye autor del ensayu Llingua estándar y normalización llingüística: la estandarización de les llingües subordinaes (Araz, 2008) y Nunca vencida. Una historia de la idea d'Asturies (La Fabriquina, 2023).

Dirección:

Xaime Martínez Menéndez (Uviéu, 1993) ye escritor, filólogu y músicu de pop. Escribió poemarios mesmo en castellanu como n'asturianu, como Cuerpos perdidos en las morgues, col que ganó'l Premiu Nacional de Poesía Xoven «Miguel Hernández» en 2019.
Espublizó dos discos xunta'l grupu d'artfolk La Bande y un llibru-discu en solitario, Ósculos d’agua nel Imperiu Asturianu.
Anguaño investiga engarradielles del sieglu XVIII na Universidá d'Uviéu y La fuercia o les 4 epifaníes de Martín Feito ye la so primer novela.